‘മലയാളി പെന്തെക്കോസ്ത് ചരിത്രത്തിൽ ഇനി മുതൽ പറന്തലും’; ഏ. ജി. കൺവൻഷൻ സെന്റർ, മലയാളം ഡിസ്ട്രിക്റ്റ് സൂപ്രണ്ട്, പാ. ഡോ. പി. എസ്. ഫിലിപ്പ് ഉത്ഘാടനം ചെയ്തു
(ഏ. ജി. വാർഷിക കൺവൻഷൻ ആരംഭിച്ചു)
“ഈ ആത്മീയ സംഗമം ദേശത്തിന് അനുഗ്രഹമായിരിക്കും; ദോഷമാകുന്ന ഒരു പ്രവർത്തിയും ഏ. ജി. സമൂഹത്തിൽ നിന്നുമുണ്ടാകുകയില്ല”, പാ. ഡോ. പി. എസ്. ഫിലിപ്പ്
“ലോകചരിത്രത്തിന്റെ അനിവാര്യ നിവൃത്തിയായിരുന്നു യേശുക്രിസ്തുവിന്റെ ക്രൂശ് മരണം”, പാ. ഡോ. വി. ടി. എബ്രഹാം
അടൂർ : ഏ. ജി. മലയാളം ഡിസ്ട്രിക്ട് കൗൺസിൽ ജനറൽ കൺവൻഷൻ, മലയാളം ഡിസ്ട്രിക്ട് സൂപ്രണ്ട്, പാ. ഡോ. പി. എസ്. ഫിലിപ്പ് അടൂർ പറന്തലിൽ ഉത്ഘാടനം ചെയ്തു. പാ. ഡോ. ഐസക്ക് വി. മാത്യുവിന്റെ അദ്ധ്യക്ഷതയിൽ വൈകിട്ട് 6 മണിക്ക് നടത്തപ്പെട്ട ഉത്ഘാടന സമ്മേളനത്തിൽ, പുതിയ കൺവൻഷൻ ഗ്രൗണ്ടിന്റെ ഉത്ഘാടനവും ആയിരങ്ങളുടെ സാന്നിധ്യത്തിൽ ഡോ. പി. എസ്. ഫിലിപ്പ് നിർവഹിച്ചു. തുടർന്ന് പാ. ബാബു വർഗീസിന്റെ അദ്ധ്യക്ഷതയിൽ നടത്തപെട്ട പ്രാരംഭ രാത്രിയിലെ കൺവൻഷനിൽ പാ. ഡോ. വി. ടി. എബ്രഹാം (സൂപ്രണ്ട്, SIAG) മുഖ്യ പ്രസംഗകനായിരുന്നു. അടൂർ MLA, ചിറ്റയം ഗോപകുമാർ ഉൾപ്പടെ വിവിധ രാഷ്ട്രീയ ജനപ്രതിനിധികൾ സന്നിഹിതരായിരുന്നു. പാസ്റ്റർമാരായ ടി. ജെ. സാമുവേൽ (മുൻ സൂപ്രണ്ട്), സാം ജോർജ് (ജനറൽ സെക്രട്ടറി, ഐപിസി), സി. സി. തോമസ് (ഓവർസിയർ, ചർച്ച് ഓഫ് ഗോഡ് കേരള സ്റ്റേറ്റ്), പി. ജി. ജേക്കബ് (ശാരോൻ) തുടങ്ങി അനേക പ്രതിനിധികൾ ആശംസകൾ അറിയിച്ചു. പാസ്റ്റർമാരായ ടി. ജെ. സാമുവേൽ, ഡോ. ഡി. മോഹൻ, കെ. ജെ. മാത്യു, എബ്രഹാം തോമസ്, ജോൺസൺ വർഗീസ്, ജോർജ് പി. ചാക്കോ, ഡോ. ഐസ്സക് വി. മാത്യു, ടി. വി. പൗലോസ്, എ. രാജൻ, എം. എ. ഫിലിപ്പ് എന്നിവരാണ് മറ്റ് മുഖ്യ പ്രസംഗകർ. കൺവൻഷനോടനുബന്ധിച്ച് ശുശ്രുഷക സെമിനാർ, മിഷൻസ് സമ്മേളനം, ഓർഡിനേഷൻ ശുശ്രുഷ, സൺഡേ സ്കൂൾ / സി. എ. പൊതുസമ്മേളനം എന്നിവ ക്രമീകരിച്ചിട്ടുണ്ട്. ഫെബ്രുവരി 9 ന് നടത്തപ്പെടുന്ന സംയുക്ത ആരാധനയോടും കർത്തൃമേശയോടും കൂടി മഹാസമ്മേളനം സമാപിക്കും. ഏ. ജി. കൺവൻഷൻ ക്വയർ ഗാനശുശ്രുഷയ്ക്ക് നേതൃത്വം നൽകി.
(വാർത്ത : പാ. ലിജോ കുഞ്ഞുമോൻ)