കൊച്ചി : കളമശ്ശേരി സാമ്ര കൺവൻഷൻ സെന്ററിൽ നടന്ന യഹോവസാക്ഷി സമ്മേളനത്തിലെ സ്ഫോടനത്തിന് ഒരാണ്ട്. 2023 ഒക്ടോബർ 29, ഞാറാഴ്ച രാവിലെ 10 മണിക്കായിരുന്നു എട്ട് പേരുടെ ജീവനെടുത്ത ഉഗ്ര ബോംബ് സ്ഫോടനം. ഇന്ത്യൻ മാധ്യമങ്ങളുടെ ശ്രദ്ധ പിടിച്ചു പറ്റിയ ക്രൂരകൃത്യത്തിന്റെ ആദ്യ മണിക്കൂറുകളിൽ കേരളത്തിന്റെ മതേതര മനസ്സിനെതിരെ പല ചോദ്യങ്ങളും ഉയർന്നു. എന്നാൽ ഉച്ചയോടെ ഡൊമിനിക് മാർട്ടിന്റെ കുറ്റസമ്മത വീഡിയോ പുറത്ത് വന്നു. കൊടകര പോലീസ് സ്റ്റേഷനിൽ സ്വയം കീഴടങ്ങി. ബോംബ് ഉണ്ടാക്കിയ വിധം, പെട്രോൾ ബില്ലുകൾ, പടക്കം വാങ്ങിയ കട എല്ലാം പ്രതി ഡൊമിനിക് തന്നെ പൊലീസിന് കാണിച്ചു കൊടുത്തു. മാര്ട്ടിന് പിന്നിൽ മറ്റാരുമില്ലെന്ന് പോലീസ് തീർപ്പിലെത്തി. 284 സാക്ഷികളും 150 രേഖകളും ഉൾപ്പെടുത്തി 3500 പേജുള്ള കുറ്റപത്രമാണ് ഏപ്രിലിൽ പോലീസ് സമർപ്പിച്ചത്. കേന്ദ്ര ഏജൻസികളും പ്രാഥമിക അന്വേഷണം നടത്തി. ഡൊമിനിക് മാർട്ടിനെതിരെയുള്ള UAPA വകുപ്പ് സർക്കാർ മരവിപ്പിച്ചു.
ഒരു പകൽ മുഴുവന്റെ ആകാംക്ഷയുടെ ഒടുവിൽ രാത്രിയോടെ ചിത്രം തെളിഞ്ഞു. ഭീകരവാദ ആക്രമണം അല്ലെന്ന് പോലീസ് ഉറപ്പിച്ചു. ഒരാണ്ടിന് ഇപ്പുറം ഉത്തരം ലഭിക്കാത്ത ചില ചോദ്യങ്ങൾ ബാക്കിയാക്കി എട്ട് കുടുംബങ്ങളുടെ സങ്കടജീവിതം ബാക്കി. എന്തിനായിരുന്നു ഈ നരനായാട്ട് ? ക്രൂരകൃത്യം നടത്തിയ പ്രതിക്കുള്ള ശിക്ഷ എന്ത് ?
