‘റോമർക്ക് എഴുതിയ ലേഖനം’ – ഒരു പഠനം (122)
പാ. ഡോ. അലക്സ് ജോൺ, M.Th; Th.d
ക്രിസ്തുവിന്റെ പ്രാതിനിദ്ധ്യ മരണം
1) പാപസംബന്ധമായി ഒരിക്കലായി മരിച്ചു. (അവന്റെ മരണത്തിന്റെ പര്യാപ്തത (റോമാ : 6:10)
2) അഭക്തർക്കും പാപികൾക്കും വേണ്ടി മരിച്ചു (അവന്റെ മരണത്തിന്റെ ഗുണഭോക്താക്കൾ (റോമാ :5:6,8)
3) ക്രിസ്തുയേശു മരിച്ചവൻ, മരിച്ചിട്ട് ഉയിർത്തെഴുന്നേറ്റവൻ (മരണവും പുനഃരുത്ഥാനവും അന്യോന്യപൂരകം (റോമാ : 8:34)
4) ക്രിസ്തു നമ്മുടെ പാപങ്ങൾക്ക് വേണ്ടി മരിച്ചു (അവൻ മരിച്ചതിന്റെ കാരണം) 1 കോരി :15:3
5) എല്ലാവര്ക്കും വേണ്ടി ഒരുവൻ മരിച്ചു (അത് കൊണ്ട് എല്ലാ വിശ്വാസികളും അവനോട് കൂടെ മരിച്ചു) 2 കോരി :5:14
6) അവൻ എല്ലാവര്ക്കും വേണ്ടി മരിച്ചു (വിശ്വാസികൾ അവനായി ജീവിക്കേണ്ടതിന്) 2 കോരി :5:15
7) യേശു മരിക്കയും ഉയിർക്കയും ചെയ്തു (മരിച്ചവരും ജീവനോടിരിക്കുന്നവരും തേജസ്കരിക്കപ്പെടും എന്നതിന്റെ ഉറപ്പ്) 1 തെസ്സ :4:14
8:35 – സ്നേഹത്തിൽ നിന്ന് നമ്മെ വേർ പിരിക്കുന്നതാർ ?
“ക്രിസ്തുവിന്റെ സ്നേഹത്തിനും നമുക്കും ഇടയിൽ ഒരു അകലം ഉണ്ടാക്കുവാൻ ആർക്ക് കഴിയും ?” ശത്രു ഉപയോഗിക്കുന്ന 7 ആയുധങ്ങളാണ് ഇവിടെ പറഞ്ഞിരിക്കുന്നത്. ‘ഏത് നിലയിലുള്ള പരിശോധനകളോ കഷ്ടതകളോ എല്ലാ യുഗങ്ങളിലുമുള്ള ദൈവജനത്തിന്റെ അവകാശമായിരുന്നു. നമ്മോടുള്ള ക്രിസ്തുവിന്റെ സ്നേഹം നശിപ്പിക്കുവാൻ അവയ്ക്ക് കഴിയാഞ്ഞത് പോലെ അവ നമുക്ക് അവനോടുള്ള സ്നേഹവും ചലിപ്പിക്കരുത്. വേർപിരിക്കുന്നതെന്ത് എന്നല്ല ആര് എന്നാണ് ചോദ്യം. താഴെ പറയുന്നവയ്ക്ക് ആളത്വം കല്പിച്ച് പറയുകയാണ്. ദ്വന്ദ യുദ്ധത്തിൽ ആയുധം ധരിച്ച് നിൽക്കുന്ന പടയാളിയെപ്പോലെ ഈ ഏഴ് പേരും നിൽക്കുകയാണ്. ക്രിസ്തുവിന് വേണ്ടി ഇത്രയധികം സഹിച്ച് പൗലോസിൽ നിന്നാണ് ഈ വെല്ലുവിളി ഉയരുന്നതെന്നോർക്കുക. (2 കോരി :11:11-33; 1 കോരി 4:10-13)
കഷ്ടതയോ സങ്കടമോ ഉപദ്രവം : കഷ്ടതയും സങ്കടവും ഉപദ്രവം ഉണ്ടാക്കുന്നു. പട്ടിണി, നഗ്നത. ഉപദ്രവം ക്ഷാമവും നഗ്നതയും വരുത്തുന്നു. ആപത്ത്. പട്ടിണിയുടെയും നഗ്നതയുടെയും ഫലമായ ആപത്ത്. വാൾ. മരണത്തെ കാണിക്കുന്നു. ഈ ഏഴ് കാര്യങ്ങളും പൗലോസിന്റെ അനുഭവത്തിൽ നിന്ന് അടർത്തിയെടുത്ത അനുഭവങ്ങളാണ്. (1 കോരി :4:11-13). കഷ്ടതയനുഭവിക്കുമ്പോൾ ക്രിസ്തുവിന്റെ സ്നേഹത്തെക്കുറിച്ച് ബോധവാന്മാരാകുവാൻ വിഷമമാണ്. അവന്റെ കോപത്തിന്റെ പ്രകടനമാണോ ഈ കഷ്ടത എന്ന് വിശ്വാസി ചിന്തിക്കുന്നു. നമ്മുടെ അർഹത കൊണ്ടല്ല, നാം ക്രിസ്തുവിന്റെതായത്കൊണ്ടാണ് ദൈവം നമ്മെ സ്നേഹിക്കുന്നത്. ദൈവസ്നേഹം, നാം കഷ്ടത അനുഭവിക്കുന്നതിനാലല്ല ക്രിസ്തു നമുക്ക് വേണ്ടി കഷ്ടമനുഭവിച്ചതിനാലാണ് വെളിപ്പെടുന്നത്.ഭൗതീക അനുഗ്രഹങ്ങൾ അവന്റെ സ്നേഹത്തിന്റെയോ കഷ്ടത അവന്റെ സ്നേഹരാഹിത്യത്തിന്റെയോ തെളിവല്ല. പിന്നെയോ ക്രൂശാണ് അവന്റെ നിത്യസ്നേഹത്തിന്റെ പ്രദർശനശാല.
