ഹെബ്രോൻപുരം : ഇന്ത്യ പെന്തെക്കോസ്ത് ദൈവസഭയുടെ 100 – )മത് അന്തർദേശീയ കൺവൻഷൻ ഇന്ന് (ജനു. 14 ന്) വൈകിട്ട് 5:30 ന് സഭാസ്ഥാനമായ കുമ്പനാട് ഹെബ്രോൻപുരത്ത് ഐപിസി ജനറൽ പ്രസിഡന്റ് പാ. ഡോ. വത്സൻ എബ്രഹാം ഉത്‌ഘാടനം ചെയ്തു. ഐപിസി ജനറൽ സെക്രട്ടറി പാ. ബേബി വർഗീസ് അദ്ധ്യക്ഷനായിരുന്നു. മഹായോഗത്തിന്റെ ചിന്താവിഷയം “യേശു ക്രിസ്തുവിനെ ശ്രദ്ധിച്ചു നോക്കുക” എന്നതാണ്. ‘നൂറ് വർഷം പിന്നിടുന്ന ഐപിസി വാർധിക്യത്തിലല്ല, മറിച്ച് ശക്തിയോടെ മുന്നേറാൻ ദൈവം ഇടയാക്കട്ടെ. ദൈവസഭയുടെ കണ്ണുകൾ ദൈവത്തിൽ കേന്ദ്രീകരിക്കുവാൻ ദൈവം കൃപ നൽകട്ടെ’, ഉത്ഘാടന സന്ദേശത്തിൽ പാ. ഡോ. ടി. വത്സൻ എബ്രഹാം ഉത്ബോധിപ്പിച്ചു.
പാ. ടി. എ. ചെറിയാൻ പ്രാർത്ഥിച്ചാരംഭിച്ച മഹായോഗത്തിൽ ഐപിസി ജനറൽ ജോയിന്റ് സെക്രട്ടറിമാർ പാ. തോമസ് ജോർജ്, കാച്ചാണത്ത് വർക്കി എബ്രഹാം എന്നിവർ ശദാബ്‌ദി കൺവൻഷൻ പാട്ട് പുസ്തകം പ്രകാശനം ചെയ്തു.
അതിഥി പ്രസംഗകരെ കൂടാതെ ഐപിസി ജനറൽ പ്രസിഡന്റ് പാ. ഡോ. ടി. വത്സൻ എബ്രഹാം, പാസ്റ്റർമാരായ ഫിലിപ്പ് പി. തോമസ്, തോംസൺ കെ. മാത്യു, ബാബു ചെറിയാൻ, തോമസ് ഫിലിപ്പ്, സണ്ണി കുര്യൻ, ജോൺ കെ. മാത്യു, കെ. സി. തോമസ്, വിത്സൺ ജോസഫ്, ജെയിംസ് ജോർജ്, വർഗീസ് എബ്രഹാം, രാജു ആനിക്കാട്, കെ. ജെ. തോമസ്, ഷാജി ഡാനിയേൽ എന്നിവർ വചന ശുശ്രുഷ നിർവഹിക്കും. പ്രസംഗം തത്സമയം വിവിധ ഭാഷകളിലേക്ക് തർജ്ജിമ ചെയ്യും.
ഭാരതത്തിലെ പെന്തെക്കോസ്ത് കൺവൻഷനുകളിൽ ഏറ്റവും പ്രധാനപ്പെട്ട കുമ്പനാട് കൺവൻഷനിൽ മദ്ധ്യസ്ഥ പ്രാർത്ഥന, പ്രഭാത പ്രാർത്ഥന, ബൈബിൾ ക്ലാസ്സ്, മിഷനറി സമ്മേളനം, പ്രഫഷനുകളുടെ സമ്മേളനം, മ്യൂസിക്ക് ഫെസ്റ്റ്, ഹെബ്രോൻ ബൈബിൾ കോളേജ് ബിരുദദാനം, സൺഡേ സ്കൂൾ / PYPA / വിമൻസ് ഫെലോഷിപ്പ് സമ്മേളനങ്ങൾ, ഹിന്ദിയിലുള്ള പ്രത്യേക സമ്മേളനം, യൂത്ത് അഡ്വാൻസ്, വിദേശ മലയാളീ വിശ്വാസികളുടെ സമ്മേളനം, ഐപിസി ഗ്ലോബൽ മീഡിയ മീറ്റ്, സ്നാനം, പൊതുയോഗങ്ങൾ എന്നിവ ക്രമീകരിച്ചിട്ടുണ്ട്.
ഗായകരായ വിജയ് ബെനഡിക്ട് (മുംബൈ), വിത്സൺ ജോർജ് (ജയ്‌പൂർ), ദയാനിധി റാവു (കൊൽക്കത്ത), എന്നിവരോടൊപ്പം 100 പേരടങ്ങുന്ന ഗായകസംഘം ഗാനശുശ്രുഷയ്ക്ക് നേതൃത്വം നൽകും.
ജനുവരി 21 ന് നടക്കുന്ന സഭായോഗത്തോട് കൂടി മഹായോഗം സമാപിക്കും. കേരളത്തിന് പുറത്ത് നിന്ന് 2500 ലധികം ശുശ്രുഷകന്മാർ ശതാബ്ദി കൺവൻഷനിൽ പങ്കെടുക്കും. കൺവൻഷന് മുന്നോടിയായി 40 ദിന ഉപവാസ പ്രാർത്ഥന കുമ്പനാട് നടത്തപ്പെട്ടു.
പാ. ഡോ. വത്സൻ എബ്രഹാം (ജനറൽ പ്രസിഡന്റ്), പാ. ഫിലിപ്പ് പി. തോമസ് (ജനറൽ വൈസ് പ്രസിഡന്റ്), പാ. ബേബി വർഗീസ് (ജനറൽ സെക്രട്ടറി), പാ. തോമസ് ജോർജ്, വർക്കി കാച്ചാണത്ത് (ജോയിന്റ് സെക്രട്ടറിമാർ), ജോൺ ജോസഫ് (ജനറൽ ട്രഷറർ) എന്നിവരുടെ നേതൃത്വത്തിൽ വിവിധ കമ്മറ്റികൾ കൺവൻഷന്റെ ക്രമീകരണങ്ങൾക്ക് നേതൃത്വം നൽകുന്നു.
